Гьиссерин кимел

Гьиссерин кимел
Седагет Керимова

Седакъет Керимова лезги ва азербайжан поэзиядални прозадал рикI алайбуруз хъсандиз чида. Адан къелемдикай хкатнавай шииррин, поэмайрин, гьикаяйрин, пьесайрин, повестрин ва романрин хъсан суракьар къецепатан уьлквейризни чкIанва. С.Керимовадин эсерар лезги, азербайжан, урус, немец, туьрк ва къумукъ чIаларал чапдай акъатнава. «Гьиссерин кимел» С.Керимовадин 30 лагьай ктаб я. Ина шаирди эхиримжи йисара къелемдиз къачунвай поэзиядин чешнеяр, гьакIни цIийи кьилелай туькIуьрнавай поэмаяр гьатнава. Ктаб кIелдайбурун рикIяй жедайдан чIалахъ я чун.

Седагет Керимова

Гьиссерин кимел

Са чIехи мел кIанда чаз

ДАГЪ АВАНИ ЗАВ КЪВЕДАЙ?

Зи гуьгъуьна за авур кьван гъалатIар,

Зи гуьгъуьна юргъунвилер, галатар,

Зи гуьгъуьна дердер, гъамар – алатай,

Вуч аматIа зи вилериз ахквадай?

Зи гуьгъуьна зи гунагьрин пар – шеле,

Зи гуьгъуьна авунвай кьван кар – силе,

Зун са тар я – руьгь юзазвай гьар хиле,

Вуж аматIа захъ агъвадай, захъ кудай?

Вилерикай карагда зи шумуд кар,

Атай чIавуз жуван рикIяй тIалдин свар,

ЦIалцIамариз алахъда зун гана гъар,

Жагъида сад – къван кьуна и гъар хадай.

Вуч аматIа захъ зи амай уьмуьрда?

ГуьтIуь хьанва шегьре рекьер, уьмуьр – дар,

КIвачин я зун, гъиле кьуна шумуд кар,

Вуж ава заз и дуьньяда гуж гудай?

Руьгь квачирбур акваз зи рикI цIрада,

За алахъна къелемдив руьгь храда,

Зи хирерал кьел алахда парада,

Къекъведа зун са бендедихъ – гъил кьадай.

Инлай кьулухъ вуч жедатIа, хьурай мад,

Хажалатар марф хьана зал кьурай мад,

Заз кьисметди цIийи тIалар гурай мад,

Эхиз жедай дагъ авани зав къведай?

УЬМУЬР ЛАГЬАЙДИ

Са кьакьан дагъ я кьван уьмуьр лагьайди,

Садрани кукIушрив агакьдач хьи, гъил.

Рехъ куьтягь тежерди, рехъ галуддайди,

Бес вучиз адакай атIудачтIа вил?

Са яргъал дагъ я кьван уьмуьр лагьайди,

ДатIана саврухар ракъурда хьи, вал.

КIвенкIве рагъ къалуриз, вун алцурариз,

Ахпа харув ягъаз агудда вав тIал.

Са къариб дагъ я кьван уьмуьр лагьайди,

Циферив чилериз гъамар чукIурдай.

Яргъариз тухвана вун синтIер ягъаз,

Ахпа рехъ алатай шив хьиз чукурдай.

Са секин дагъ я кьван уьмуьр лагьайди,

Низ чидай хура цIуд вулкан авай чIал?

Садбуру пархъунда бере атайла,

Садбуруз жагъидач юзадай мажал.

Са ялгъуз дагъ я кьван уьмуьр лагьайди,

Са куьлуь къван я кьван чун адан синел.

Ялгъуздиз хъфида дуьньядлай вири,